a2Kol 4.17
b10Kol 4.9
c23Kol 1.7, 4.12;
d24Apo 12.12,25, 13.13, 15.37-39, 19.29, 27.2, Kol 4.10,14, 2 Tim 4.10-11

Filemongö Kimbi Polnöŋ Filemongöra Kimbi alök.

Jim-asa-asari

Azi öŋgöŋgöŋi Filemon mi Kolosi sitinöŋ mala uruŋi meleŋda zioz nup memba welenqeqeŋi qetŋi Onesimus galöm köliga töndup unjurata Rom sitinöŋ anök. Miaŋgöreŋ anda Polbuk mutulaŋgöba keuŋi möta uruŋi meleŋda Polbuk Buŋa nup meyohot. Polnöŋ kösö mire tata Onesimus toŋaŋgöra Kimbi ki ohoba böröŋe ala melaiiga Kolosi liliŋgöyök. Kimbi kiaŋgöreŋ uruŋi meleŋnöhi, miaŋgö buzupŋi indela Filemon uruŋi kewö kuŋguyök: “Gi mönö welenqeqegahö pinjitŋi mosöta yambuk urumohok aka köl öröm waŋginöŋga urumeleŋ alagi ewö qöhöröŋge kiniga yaŋgöra söŋgaiba malman.”

Buk kiaŋgö bahöŋi bohonŋi 4 mi kewö:

Keu mutukŋi 1-3

Polnöŋ Filemon möpöseiza 4-7

Onesimusgöra Filemongö uruŋi kuŋguyök 8-22

Kimbigö keu kötŋi bohonŋi 23-25

Philemon

1O wölböt alani aka neŋakni Filemon!

Pol nöŋön Jisös Kraistkö nupŋi memakzalaŋgöra aka gwaröhöm niŋgigetka kösö mire tatzal. Urumeleŋ alani Timoti yaŋön nömbuk tariga nöŋön göbuk keu eraum mötpitköra kimbi ki ohozal.

 2Mewöyök ambi ketaŋi urumeleŋ nenini Apia aka Arkipus urumeleŋgö bimqeqe azinini aka urumeleŋ könagesö göhö mire tokomakzei, nöŋön kimbi ki eŋgöra ohozal.

 3Anutu Iwinini aka Kembu Jisös Kraist yetkön kalem möriam eŋgiyohotka luainöŋ malme. a

Filemongö urukalemŋaŋgöra möpöseiza.

4Nöŋön nalö dop köuluköba gi mötmörim gihimakzalaŋgö dop kewögöra Anutuni saiwap jim waŋgimakzal: 5Gi Kembu Jisös möt nariba jöpaköm waŋgiba Anutugö ambazip sarakŋi pakpak jöpaköba urukalem ak eŋgiba maljan.

 6Saiwap jiba kewö köulukömakzal: Mötnaripkan mönö köhöiba pöwöwöm aiga ölöp qöhöröŋnine kinda nembuk mötnaripkö keuŋi jim sehiba malman. Mewö Kraistpuk qekötahöba kininga kalem ölöpŋi ölöpŋi neŋgimakzawi, gi miaŋgö könaŋi körekŋanök möt sölöŋgöman. 7O urumeleŋ alani, gi ambazip sarakŋi körö-ölöwak qem eŋginöŋga amgöba malje. Urukalemgi miaŋgöra nöŋön gwötpuk söŋgaibiga miaŋön uruni naŋgömakza.

Filemonöŋ Onesimus köl örömapköra qesiza.

8Mewö malnöŋga Kraistpuk qekötahöziga ölöp awösamkakak aka kukösum qakŋe kinda yuai akŋangö jim kutum gihibileŋak. 9Mi töndup Anutunöŋ uruŋan jöpaköm netkizawaŋgöra aka ölöp jimkutukutuni mosöta ulet miyök ulet gihimam. Gi Pol nöŋgö silikni mötzan. Nöŋön azi namŋi akzal aka Kraist Jisösgö nupköra aka nalö kewöŋe kösö miri azia mewöyök akzal. 10Ni kösö miri kiaŋgöreŋ alagi qetŋi Onesimus aitoŋgöba bauköm waŋgibiga uruŋi meleŋda mötnaripkö nahöni ahök. Miaŋgöra merak yaŋgö numbu jit memba yaŋgöra aka ulet gihizal. 11Yaŋön mutuk welen qeba laŋ möndöba injarere mala qemasolokep ak gihiba malökmö, nalö kewöŋe letota gi aka ni ölöpŋanök bauköm netkiiga ölŋi asuhumakŋawaŋgö dop akza.

 12Yaŋön nani wölböt nahöni akza aiga nani wölbötni ewö melaim waŋgibi liliŋgöba göhöreŋ kaza. 13Nöŋön Ölöwak Buŋagöra aka kösö mire tatzal. Miaŋgöra Onesimus jöhöbi nömbuk mala göhö salupke bauköm niŋgimapkö mötzal. 14Mewö mötzalmö, bauköm niŋgimapkö qahö kuŋgum gihizal. Sihimgan jiiga bauköm niŋginöŋga dop köljapmö, göŋön welenqeqegi niŋgiman me aŋgön kölman, miaŋgöra Oŋ! qahö jinöŋga nanök jöhöm waŋgimamgö osizal.

 15Onesimusnöŋ kewögöra aka gömosörök me? Yaŋön nalö töröptökŋi yaigep mala kunbuk liliŋgöba kaba göbuk nalö teteköŋi qahö malma. 16Mutuk welenqeqe omaŋi aka malökmö, nalö kewöŋe mi oŋgita azi qainŋi kun akza. Uruŋi meleŋda mönö wölböt alanina akza. Nöŋön yaŋgöra gwötpuk ak niŋgiiga göŋön azi mi eknöŋga Kembugö buŋaŋi aiga yaŋgöra mewö ni noŋgita önöŋi qahö ak gihimakŋa.

 17Göŋön nömbuk ala-ala aka maljit mötnöŋga nöŋön kabi köl öröm niŋgibanak ewö, mönö Onesimusnöŋ kaiga mewö köl öröm waŋgiman. 18Yuai kun ak bölim gihiyök me yaŋgöreŋ tosa kun göhöreŋ ahöza ewö, mia mönö nöŋgö tosaya jinöŋ ahöma. 19Ni Pol mönö nani börönan kewö ohozal, “Nöŋön mi mekömam.” Nöŋön bauköm gihibi urugi meleŋnöŋga tosagi ketaŋi mi mekömangöra nangi mewöŋanök nöŋgö buŋaya jim teköm aŋgunöŋga dop kölbawak. Miaŋgöra ölöp kewö jibileŋak: Onesimusgö tosaŋi mi mönö jinöŋga nange tosaya ahöma. 20O urumeleŋ alani, Kembugö Buŋa gihiali, mi mönö meleŋda bauköm niŋgimangö ak niŋgiza. Kraist qekötahözani, miaŋgö dop mönö Onesimus köl örönöŋga nöŋgö urunan amgöba ölöwakŋa.

 21Keuni tem kölmani, mi möt nariba keuni ohoba könaŋamgi kewö ahöi mötzal: Keu jizali, mi mönö oŋgita qetpuk ak soroköman. Mewö. 22Keu kun ki: Eŋön köulukögetka Kembunöŋ ni meleŋ niŋgii eŋgöreŋ kamamgö al mamböta jörömqöröm akzal. Miaŋgöra mönö miri uruŋi kun nöŋgöra mem kelötman. b

Yaizökzök aka kötuetmötuet keu teteköŋi

23Alani Epafras yaŋön Jisös Kraistkö nupköra aka nömbuk kösö mire tata yaizökzökŋi ali göhöreŋ kaza. 24Neŋakurupni nup mohotŋe memakzini Mak, Aristarkus, Demas aka Luk yeŋön mewöyök yaizökzökŋini algetka göhöreŋ kaza.

 25Kembu Jisös Kraistkö kalem möriamnöŋ mönö uŋaŋini kötuetköba embuk ahöma. Mewö. c , d
Copyright information for BMU